زهيريات عراقية

تتبطر انت وعلــــي ماشفت منك ورد
جنت ارسل وما ترد اسكت واجامل ورد
واردك فارغ علي ماشفت منك ورد
ترسل عليه بـده وارسل عليك بجمع
ما تلتكي ومن تجي حاضرك دوم بجمع
طاحت عليك النظر وانتى التجازي بجمع
لطلع انبش بهلك العــن واسب او ارد

عيد انت تفرح وانا لامــــر فرح لاعيد
واسهام ثكلك علــــي لحسب انا لاعيد
وارجع انــــا بدنيتي واتحذرك لاعيد
من شفتك اني وطحت طـب للكلب ناظرك
وارضيت احسب واعد طول العمر ناظرك
غلطه اني من اعشكت طالب وانا ناظرك
لرجع لذاك الـــــوكت واتحذرك لاعيد




يولفي اسكيك مــــن طب العرب والهند
روحي وجروحي وكلب تبجب بدمع والهند
من كالو ولفك مرض عاف الدرس والهند
ولفي يوافي يدرس هندسه وطـــب وجبر
وما يترك المدرسه لــــو لاعليل وجبر
مكسور كلب الولف بــــس بلكلب ما جبر
شايف مجبر يخي حــــــن علكلب والهند


بطرواك طول العمر صبح ومسه ذاكره
ولدكول عني بعد هذا الولف ذاكره
كلبي ناسي وامس بالطيف اجه ذكره
طالبني رغم الجره بحنينه خايب شحن
ودموعي جي سافرت بعيوني صدك شحن
نقالي عالشاحنه ومن كال تم الشحن
كلت ارسله الروح جاوب ممليه الذاكره

مسكين هذا الكلب يا صاحبي مره
يا ما سكاك الشهد ما ضوكك مره
يتمنى كبل الاجل يلكاك ولو مره
بس انته كلبك صخر ما لحظه حنيت
وانه لالك ديرتي بيبانها حنيت
من شفت بيك الالم ظهري الك حنيت
طيبتي يم شوفتك وجهك علي مره



انشالله ينال رضاكم مجرررررررررروح